চিটাইংগে ভাষার হবিতেঃ হাবিল

0
2

হাবিল

হাবিল তারা তেরো ভাই
বুদ্ধির অভাব নাই,
এক হাবিলুর হাবিলাতিত
আরুগ্গর ভাত নাই!

বেয়াক বুঝে, বেয়াক জানে
সমাজ, দেশ সরকার
হাবিলুর লাই মাতা ন যায়
মাতিলে সম্মান ছারহার!

হইলে হতা রাজনীতি লই,
ইয়ানতঅ বউত হাবিল,
ধর্মও জানে, বেয়াক জানে
মনে অয় কামিল ফাজিল!

বিশ্ব লইয়েরে হতা হইলে অ
ইতে বেয়াকগিন জানে!
রাশিয়ার যুদ্ধু তে বাজাইয়ি ফারলার
যেন বাইডেন অ তারে মানে!

এতোদিন ইতে হডে আছিল?
ফুছর গইরতু মনে হঅয়,
হাবিলুর আবার চামসাঅ বেশি!
ইয়ুনেঅ বড়ড়ো ভাব লয়!

আরেক হাবিল চাআর দোয়ানত
যেএন বক্তৃতে দে,
বাইজ্জে বাঁশর গলা উগ্গো
হান নান ফাডাই দে!

নাই হাম হরজ, নাই ফরা লেহা
নাই নামাজ রোজা,
সমাজর লাই এই হাবিলউন
আসলে বড় বোঝা।

হতা হম হই, হাম গরঅ গুই
ওয়া হাবিলুর সদ্দার,
ন জানিএরে ওয়াইজ ন গইরজু
জাননআন আগে দরহার।


নাজিম
নভেম্বর ১৮, ২০২২